週二, 10 五 2022 02:22

主場對列斯聯賽後報告

愛隊今仗再一次投下信心嘅一票比小將尼基迪亞,結果亦不負所託。上半場僅5分鐘,尼基迪亞把握麥美利亞未能喺龍門口解圍嘅失誤,成功搶得皮球射入領先1比0。正所謂行運一條龍,5分鐘後馬天尼利左路傳中,尼基迪亞門前掃入領先2比0兼梅開二度。賽事另一個轉列點喺27分鐘出現,艾寧喺左路底線雙腳飛鏟馬天尼利,原本球證只係向艾寧出示黃牌,不過經VAR檢視後球證再改判紅牌,客軍早段除落後兩球之外仲要少打一人。38分鐘新隊長奧迪哥特右路直射罰球被列斯後衛護空門而未能將比數擴大,最終上半場愛隊以2球優勢返回更衣室。

下半場雖然愛隊控球比率一度超過80%,但後防不集中嘅老毛病喺66分鐘再出現,列斯聯下半場首個埋門機會就取得入球,一次角球攻勢菲普二傳,路蘭迪近門破網,列斯聯追成較接近紀錄。愛隊喺患得患失之下一路去到補時階段,洛迪高近頂被藍斯度接實後終於可以大步攬過主場險勝只得10人應戰嘅列斯聯2比1,愛隊35戰得66分排第4位,比第三位嘅車路士同為35戰少1分,較第五位嘅熱刺多4分,形勢可算大好,繼續堅守第4位再向第3位目標進發。
另一場北倫敦打吡戰將會喺4日後作客熱刺展開,愛隊謹記謹記再謹記就算攞唔到3分都要1分!COYG!!

閱讀 766 次數