下半場57分鐘，達帥以托沙入替維亞拿以加強攻力，但好不幸喺薩卡射中柱之後不但未能追平，更喺67分鐘再失守，獲特包斯開出角球，比拿確查頂贏，查歷達沙喺遠柱頂入，聖人領先到3比1。愛隊經過大半場可以講係水準之下嘅表現之後，終於喺最後20分鐘發揮本身應有既水準喺尾段上演絕地反擊。88分鐘，隊長奧迪哥特妙射破門，追番1球。喺補時第1分鐘，尼爾遜喺禁區施射被巴遜奴撲出後比薩卡補中，追成3比3。更差d喺完場前絕殺聖人，但托沙射門一腳中楣彈出，最後只能賽和聖人3比3完場。
愛隊喺驚濤骸浪之下搶得1分，以32場75分排榜首，但已經全無優勢，僅比踢少2場嘅第2位曼城多5分，而今季最關鍵嘅一場賽事將會喺下星期四凌晨作客聯賽第2位嘅曼城，雖然愛隊喺最近3場賽事連失6分而失去主導權，但曼城要兼顧2項杯賽再加上仲有8場聯賽賽事，就算哥迪奧拿幾咁老謀深算，人亦都係血肉之軀並不是機器，佢哋亦都會有失準嘅一日，達帥當下之務係要盡快穩定軍心提升士氣避免再多失分，總之簏死誰手，尚未知曉！希望各位廠迷勿未打先投降，一於徒弟打低師傅！