週一, 12 二月 2024 15:40

作客韋斯咸賽後報告

首先僅代表球迷會向香港各位廠迷送上至誠祝福,願各位身體健康,一元復始,萬象更新,事事如意!
今仗上半埸3分鐘,保雲吃咗一記炸糊,不過越咗位就入球無效。愛隊隨後就展開年初二大屠殺序幕。21分鐘,托沙接應薩卡右路傳中,不過頭槌高出。23分鐘,今次又係托沙,喺左路窩利抽射,不過希奧拿反應奇快奇蹟地救出。32分鐘,缺口終於打破!沙利巴接應角球一頂破網領先1比0。36分鐘,薩卡右路窄角度射門斜出。41分鐘,薩卡單刀被阿希奧拿整跌,經過VAR驗証冇越位之後,球證直指12碼,由薩卡親自操刀中鵠領先至2比0。44分鐘,加比爾接應懷斯罰球傳中一頂破網將比數拉開至3比0。喺補時第2分鐘,隊長奧迪哥特交波比托沙燙射遠柱死角位入網,愛隊遙遙領先至4比0返回更衣室,而好多主場球迷亦罕有地喺中場休息時間就已經意興闌珊離場。

下半場韋斯咸變陣換入菲臘斯同班奴斯,但依然無甚起色,愛隊依然反客為主一直圍攻,先有托沙喺12碼點埋門炒高,馬天尼利之後頭槌不中目標同埋薩卡入小禁區埋門失機。不過主隊豆腐渣嘅後防終喺63分鐘頂唔順,薩卡右路禁區推順抽射攪掂領先至5比0。錘仔幫喺2分鐘後又再次失守!65分鐘,懷斯禁區外倒戈射入世界波拉開比數去到6比0完場。
繼上一場以3比1戰勝榜首利物浦後,更以6蛋狂勝韋斯咸將得失球差與第2位少賽一場嘅曼城同為正31球及24戰得52分,但以正入球差3球而排第3位,落後榜首利物浦2分。
我哋下一場賽事將會喺嚟緊嘅星期六晚上作客對般尼,喺最近4場賽事愛隊攻入16球只失2球嘅巔峰狀態之下,期待面對排喺聯賽榜尾二嘅般尼可以再一次技術性擊到全取3分!

閱讀 56 次數