週一, 03 一月 2022 05:53

主場對曼城賽後報告

今仗係2022年英超第一場嘅比賽,不過達帥因第二次確診新冠狀病毒而不能督師。幸好有富安健洋及時康復令防線趨於完整。
上半場喺10分鐘後,愛隊利用高強度逼搶,逼到藍月亮混亂一片。先有奧迪哥特喺禁區比摩拉斯掃跌,但球證未有判罰12碼!31分鐘,泰亞尼出擊傳入中路,薩卡燙射破網領先1比0,亦係連續3仗聯賽都有入球,之後亦有馬天尼利窄位快射僅僅斜出,上半場藍月亮錄得罕有嘅射門零中框。

下半場曼城加強攻勢,57分鐘施華喺禁區內比沙加拉衫,佢亦順勢跌低,球證經VAR再睇埋電視重播後,直指12碼,由馬列斯操刀得手扳平1比1。喺扳平冇耐之後,戴亞斯冇留意摩拉斯棄關出迎,誤將皮球頂向自己龍門,阿基護空門救出之後,馬天利尼未能喺門前補射入網成為勝負關鍵點。再加上馬加希斯為阻止捷西斯前進取多一面黃牌,兩黃一紅被逐,由領先到被追和兼打少1個可謂禍不單行,亦埋下輸波嘅伏線。喺補時第3分鐘,洛迪卡斯簡迪絕殺反勝2比1,曼城亦以此比數結束比賽。
愛隊雖然今仗落敗,但有超水準表現,可惜曼城喺球證判罰尺度不一情況底下成為受益者,愛隊最終打少一個之下亦都絕冇放棄,可謂雖敗猶榮。我哋應該要以今場比賽嘅態度迎接六日後聯賽盃四強第一回合主場對利物浦嘅賽事,寄望愛隊遇強越強!永不放棄!COYG!

閱讀 76 次數