週一, 09 十月 2023 09:10

主場對曼城賽後報告

上半場初段愛隊表現有d緊張下製造咗一d險像。4分鐘,法迪奧接應右路開出角球喺尾柱凌空起腳,好彩懷斯首先救空門,解圍唔遠下被艾基接應賀蘭頭槌二傳12碼點起腳竟射上去觀眾席。開賽頭30分鐘拉耶都表現得緊張患得患失,18分鐘,佢喺禁區內被艾華利斯逼搶之下,大腳清走皮球時省中對方,好彩冇反彈入自家龍門,只係網側出界,自此拉耶亦得漸漸打起信心,同樣地愛隊站穩陣腳後漸漸打起信心開始同藍月鬥搶攻,29分鐘,哥華傑治粗暴從後攔截侵犯隊長奧迪哥特,竟然只得黃牌!再喺35分鐘又一次從後掃跌懷斯都冇比牌!呢位國際球證奧利華可謂可圈可點盡在不言中。結果上半場互無紀錄下返回更衣室。

達帥下半場即刻嚟第一個調動由馬天尼利入替托沙。而第二個調動就喺75分鐘換入富安健洋,哈伐斯同傷癒冇耐嘅湯馬斯,兩次調動可謂係達帥神來之筆,喺主動搶攻之下踢到尾段86分鐘由一班後備球員合作,先由湯馬斯長傳入禁區比富安再頭槌頂比哈伐斯,佢再助攻傳後比馬天尼利喺禁區頂抽射省中艾基改變方向入網領先1比0,結果愛隊就憑努力+運氣以1比0破魔咒打敗上屆3冠王,愛隊對上一次英超擊敗藍月要追溯到2015年,喺團隊士氣上可謂意義重大。
喺聯賽榜上愛隊以8戰同熱刺一樣得20分得失球差亦一樣下以得球少熱刺2球暫居次席。
嚟緊2星期係國際賽期,我哋下一場賽事將會喺22號聯賽作客對開始復甦嘅車路士,寄望各位愛隊成員喺國際檔期為國家上陣之後保持身體健康無病無痛平安歸隊!

閱讀 182 次數 最後修改於 週一, 09 十月 2023 09:11