週四, 27 四月 2023 09:52

作客曼城賽後報告

上半場7分鐘,賀蘭助攻交波比迪布尼射入領先1比0。而上半場藍月亮可以話係佔優嘅一方,亦都要多得藍斯度有水準以上嘅表現而不至多失,但去到補時1分鐘都係頂唔住要失第2球,迪布尼開出罰球,史東斯頂入有越位嫌疑嘅1球將比數拉開至2比0。

下半場54分鐘,迪布尼喺禁區接應賀蘭交波無人看管下射入領先至3比0。86分鐘,賀定接應托沙嘅傳中球破蛋追回1球。但主隊喺補時階段由賀蘭埋齋以4比1勝出今仗‘’6分波‘’之戰。
聯賽榜方面曼城以31場得73分,暫時比踢多2場嘅愛隊少2分,但已手握爭標主導權。一場非常心碎嘅賽後報告,但正所謂優勝劣敗亦都無話可說。而隨著白禮頓同樣亦輸波之下,愛隊已確定可以重返下一季歐聯,現實d講,我哋應該以英超次席為目標及期盼曼城突然失準保住非常渺小嘅冠軍機會作最後衝刺。而我哋下一場賽事將會喺下星期三凌晨主場面對已經5連敗嘅車路士,寄望愛隊再一次全取3分再贏出今次倫敦打比!

閱讀 295 次數