週一, 13 三月 2023 06:13

作客富咸賽後報告

上半場15分鐘,馬天尼利左路接應傳中波省中富咸球員入網,但經VAR檢視之後話馬天尼利出波時已經越位入球無效。不過喺爱隊展現贏波決心之下,入球只係遲與早嘅問題。21分鐘,加比爾接應托沙角球頭槌埋門得手領先1比0。26分鐘,托沙再一次助攻呃過守衛喺左路底線傳中比馬天尼利近門銅頭一搖頂入網將比數更改成2比0。補時階段先有馬天尼利窄角度抽射被利奴擋出,但之後由托沙左路傳中比隊長奧迪哥特推順抽射遠柱破網遙遙領先3比0,托沙包辦晒三個入球嘅助攻,可謂威過威士忌!結果愛隊上半場亦以3球領先主隊返回更衣室。

下半場繼續係愛隊嘅世界,51分鐘托沙中路左腳抽射,但角度太正被撲出。66分鐘,馬天尼利埋門又被利奴擋出。富咸隨後取回一d攻勢,米特羅域小禁區頭槌中柱。等到頸都長嘅時刻終於喺76分鐘來臨,養傷一段日子嘅耶穌仔捷西斯入替馬天尼利,不過餘下時間愛隊亦再冇增添記錄,主隊亦破蛋乏力,最終愛隊作客大勝3比0全取3分。
喺聯賽榜方面我哋以27戰得66分領先排喺次席嘅曼城5分。而我哋下一場比賽將會喺4天之後嘅歐霸盃16強次回合賽事主場迎戰士砵亭,希望我哋以副選上陣都可以殺敗呢支葡萄牙勁旅進入8強!COYG !

閱讀 328 次數