週日, 01 一月 2023 14:04

主場對韋斯咸賽後報告

期待已久嘅愛隊賽事經過一個多月嘅世界盃之後又返嚟喇!更難得今仗自2018年之後從未踏足酋長球場嘅雲爺爺首次重返愛隊主場睇波更激發愛隊展現出色嘅表現。

上半場5分鐘,薩卡接應尼基迪亞後腳交波射入,可惜越位在先食咗一記炸胡。愛隊一直都未能打破僵局之際,反而喺26分鐘先失守,沙利巴禁區內鏟跌保雲被判罰12碼,賓哈馬射入12碼為客軍領先1比0。補時3分鐘愛隊亦曾經獲得12碼,但被VAR推翻,最終上半場愛隊落後0比1進入更衣室。

下半場愛隊以積極嘅表現進行大反擊。53分鐘,隊長奧迪哥特右路推大位起腳,雖然射不中龍門,但皮球意外落喺薩卡腳下轉身射入,追平1比1。氣勢如虹嘅愛隊喺58分鐘再有斬獲,馬天尼利接應沙卡嘅助攻,喺窄角度射入近柱為愛隊反超前領先2比1。愛隊可謂得勢不饒人,69分鐘隊長奧迪哥特交出助攻比尼基迪亞射入保險球,最後亦以呢一球反勝韋斯咸3比1完場。

喺聯賽榜愛隊以15場得40分比多賽一場嘅紐卡素多7分及少賽一場嘅曼城多8分繼續高踞榜首。我地下一場比賽將會喺元旦日作客對近況不俗嘅白禮頓,記得記得再記得,我地唔要1分係要全取3分!COYG!

閱讀 79 次數