下半場愛隊繼續施壓,不過圖有攻勢實則欠缺埋門機會,56分鐘出現具爭議嘅入球。當時中場混戰之下拿沙亞被撞倒地不起,不過愛隊球員冇理會,由路維一射入網領先1比0。71分鐘愛隊再有將比數拉開嘅黃金機會,薩卡喺右邊出波,奧迪哥特射波之下,皮球應該會射入網窩之際,但隊長喺門前處於越位位置伸腳一撩令到入球無效,錯失將比數擴大至2比0嘅機會。之後屈福特京治把握藍斯度罕有嘅 失誤,面對空門射中網側。89分鐘古斯卡兩黃變一紅被逐離場,最後愛隊喺大好形勢之下最終只能憑下半場初段路維嘅入球以1比0小勝屈福特全取三分喺聯賽以20分排第五位,比聯賽榜首車路士少6分。
雖然愛隊喺進攻方面著實要改善埋門嘅一腳,不過防守方面實在已經改善不少,由季初三連敗至而家排喺聯賽第五位,可以話係愛隊不斷改進之中,寄望愛隊喺兩個禮拜嘅國際賽期之後能夠一鼓作氣喺聯賽作客比我哋多2分排第四位嘅利物浦可以取得更佳進步!COYG!!