今仗係4天內兩對水晶宮，繼主場聯賽盃以3比2淘汰鄰會外，今場愛隊作客亦都主宰球賽一切。開賽僅6分鐘，全面復甦嘅耶穌仔走得靚位門前射入閃電領先1比0。11分鐘，沙爾由中路偏左入禁區射入遠柱替主隊追成平手1比1。不過水晶宮球迷開心咗只係3分鐘。14分鐘，耶穌仔把握角球機會射成2比1再度領前。好不幸薩卡喺24分鐘因膝傷退下火線由托沙入替，希望佢傷勢並不嚴重盡快復出。38分鐘，又係耶穌仔！可惜門前頂中柱未能帽子戲法，好彩夏維斯執雞以3比1領先水晶宮完半場。
60分鐘，耶穌仔門前起腳被擋出，今次由懷斯補射再由馬天尼利加多一腳撞入將比數改寫為4比1。84分鐘，懷斯射入一球靚波以5比1大勝水晶宮，最後亦以此比數完場。
聯賽榜方面，愛隊以17戰得33分排第3位，比榜首利物浦少3分，但多賽2場。
我哋下一場賽事將會係罕有地有一星期休息時間喺28號凌晨主場迎戰葉士域治，寄望愛隊可以义夠電喺葉士域治身上全取3分。最後球迷會喺普天同慶嘅日子恭祝大家聖誕快樂！
