下半場熱刺初段喺控球時間上雖然比較多，但埋門就質素欠奉，反而喺63分鐘愛隊籍一次角球攻勢由加比爾接應薩卡傳送一頂破網，愛隊領先1比0。計埋今次死球入波後，愛隊自去季至今喺英超第23個死球入球，當然包括埋上季贏熱刺3比2嘅其中2球。熱刺先後換入柏沙亞、 奧度比同添姆雲拿加強攻力，81分鐘，柏沙亞遠射但炒高。89分鐘，羅美路頭槌欠角度宅拉也輕鬆接住。補時階段古路錫斯基遠射高出註定愛隊喺最近3季作客熱刺都贏波而還，愛隊今仗喺隊長奧迪哥特同懷斯缺陣下依然全取3分亦可謂變陣成功！
睇返聯賽榜方面，愛隊以4戰得10分排第2名較榜首曼城少2分。而我哋下一場賽事將會喺週五凌晨迎來歐聯戰線第一場賽事作客亞特蘭大，相信唔駛多講3分就一定要袋！COYG！！
週一, 16 九月 2024 03:11
作客對熱刺賽後報告
雖然上半場初段熱刺取得7成控球權，不過全是曇花一現，繼後就冇貨賣。4分鐘，孫興敏左路短傳入禁區交波比古路錫斯基射門，好彩拉也反應快撲出。6分鐘，古路錫斯基右路傳中，喺皮球省中人情況下改變方向被今仗有神勇演出嘅拉也救出。愛隊喺站穩陣腳後開始組織攻勢反攻。17分鐘馬天尼利傳中比夏維斯頭槌攻門，可惜被域卡利奧救出。19分鐘，馬天尼利半單刀下射遠柱，又比域卡利奧接實。29分鐘，蘇蘭基接應麥迪臣傳中銅頭一搖，皮球高拋物線下喺遠處出界。及後不論莊遜埋門被撲出或古路錫斯基喺禁區交橫抽射高出都未能威脅愛隊，結果上半場以0比0打和返回更衣室。
發佈於
賽後報告