週一, 17 四月 2023 09:54

作客韋斯咸賽後報告

上半場愛隊初段即反客為主,7分鐘就出現首個入球,韋治接應隊長奧迪哥特直線傳中,耶穌仔近門射入領先1比0。10分鐘,馬天尼利左路傳中比隊長奧迪哥特喺遠柱即時快射破網迅速領先2比0。不過愛隊喺大好形勢之下又再一次重複上週賽和利物浦嘅惡夢。33分鐘,懷斯中路搶得皮球後交比柏基達引球入到禁區,好不幸加比爾喺情急之下鏟跌咗佢,主隊穫得12碼由賓哈馬主射中鵠追成1比2較接近紀錄,最後亦以此比數完上半場返回更衣室。

下半場52分鐘,馬天尼利禁區射門而安東尼奧就以手擋球,球證示意12碼,但愛隊今場波嘅轉淚點就由呢個12碼罰球開始埋下和波伏線。薩卡主射12碼喺柱邊出界,54分鐘,保雲接應高波射地波彈地入網,追成2比2平手。之後愛隊換入托沙及佐真奴加強攻力,69分鐘,薩卡一人帶波去到禁區起腳,但法比安斯基好輕鬆接實。臨完場達帥再換入奧維亞拿,尼爾遜同尼基迪亞嘗試爭取入球,結果係事與願違再一次喺大好形勢下被追和而痛失2分。
喺聯賽榜方面愛隊以31戰74分排於榜首,領先次席少賽1場嘅曼城4分。而我哋下一場賽事將會係嚟緊嘅星期六凌晨主場對修咸頓。雖然喺最近兩場賽事連失4分之後可謂優勢全失,但最重要係保持自信戰鬥到最後一刻!COYG!!

閱讀 288 次數