週一, 23 一月 2023 06:18

主場對曼聯賽後報告

今日係大年初二,球迷會恭祝各位廠迷身壯力健,兔年行大運,愛隊贏不停!
上半場愛隊踢得非常進取,但喺17分鐘意外地首先輸第一球,湯馬斯傳球被華舒福截斷再與費蘭迪斯嚟一次撞牆,喺25碼起腳射入龍門右下角為客軍領先1比0。不過愛隊僅用咗7分鐘就將比數扳平,24分鐘隊長奧迪哥特交比左路嘅沙加高波吊入禁區,喺尾柱嘅尼基迪亞頭槌建功追平1比1。28分鐘,紅魔有麥湯遠射比藍斯度撲出底線,最後亦以1比1打和返回更衣室。
下半場愛隊好快就再度領先,53分鐘薩卡喺禁區外偏右位置擺脫艾歷臣後起左腳射門彈地入死角反超前2比1。不過6分鐘後又比客軍扳平,59分鐘,藍斯度出迎接角球同富安健洋有所誤會而甩手,被全場最矮嘅馬天尼斯頭槌補中,追成2比2。之後愛隊絕無氣餒就憑較佳體能喺最後30分鐘圍攻紅魔,70分鐘,薩卡再一次喺偏右位置射門,可惜今次中柱彈出。84分鐘,尼基迪亞近門施射,又被迪基亞神奇撲出。喺滿以為今仗會被紅魔偷走2分嘅時候,令全世界廠迷心情激動嘅一刻終於喺90分鐘出現,尼基迪亞喺門前以一記虎尾腳掃入今仗個人第2球梅開二度再透過VAR覆核後證實冇越位,最終愛隊以3比2險勝報回首循環一敗之仇。
喺聯賽排行榜繼續以19場得50分領先次席多賽一場嘅曼城5分。而我哋下一場賽事將會喺5日後足總盃作客曼城,希望達帥可以好好衡量球隊本身嘅情況而作出部署,good luck!
閱讀 37 次數
此分類更多內容: « 作客熱刺賽後報告