下半場愛隊好快就再度領先,53分鐘薩卡喺禁區外偏右位置擺脫艾歷臣後起左腳射門彈地入死角反超前2比1。不過6分鐘後又比客軍扳平,59分鐘,藍斯度出迎接角球同富安健洋有所誤會而甩手,被全場最矮嘅馬天尼斯頭槌補中,追成2比2。之後愛隊絕無氣餒就憑較佳體能喺最後30分鐘圍攻紅魔,70分鐘,薩卡再一次喺偏右位置射門,可惜今次中柱彈出。84分鐘,尼基迪亞近門施射,又被迪基亞神奇撲出。喺滿以為今仗會被紅魔偷走2分嘅時候,令全世界廠迷心情激動嘅一刻終於喺90分鐘出現,尼基迪亞喺門前以一記虎尾腳掃入今仗個人第2球梅開二度再透過VAR覆核後證實冇越位,最終愛隊以3比2險勝報回首循環一敗之仇。
喺聯賽排行榜繼續以19場得50分領先次席多賽一場嘅曼城5分。而我哋下一場賽事將會喺5日後足總盃作客曼城,希望達帥可以好好衡量球隊本身嘅情況而作出部署,good luck!