週一, 31 十月 2022 09:32

主場對諾定咸森林賽後報告

上半場5分鐘,薩卡右路傳中,馬天尼利入楔前柱飛頂破網閃電領先1比0。愛隊其後繼續強攻,耶穌仔禁區右路左腳內彎,可惜出界。而森林亦把握沙卡傳送失誤,好彩富拿一射未有命中。19分鐘,馬天尼利接應左路傳送一射,被森林球員護空門擋出。戰至26分鐘薩卡傷出,由久未出場嘅尼爾遜入替。臨完半場前出現驚險一幕,加比爾後場傳球落喺連加特腳下射門,幸好藍斯度接實,最後上半場愛隊領先1比0返回更衣室。

下半場愛隊一開波即刻嚟料,49分鐘,耶穌仔禁區先扣過森林後衛起腳被甸軒達臣撲出不遠剛好落喺尼爾遜面前,好輕鬆咁射成2比0。3分鐘後耶穌仔右路發難二傳比尼爾遜梅開二度拉開至3比0,客軍球員亦輸到無心戀戰。57分鐘,尼爾遜右路傳中比湯馬斯禁區頂燙射入網遙遙領先至4比0。77分鐘,湯馬斯直線交比耶穌仔再交橫造就隊長奧迪哥特小禁區抽射得手,遙遙領先至5比0。愛隊最終主場大炒森林5比0,全取3分兼以12戰得31分2分優勢壓過曼城重返榜首。
我地下一場賽事將會喺嚟緊嘅星期四凌晨歐霸盃主場迎戰蘇黎世,只要取得1分便可以以首名進軍下一階段淘汰賽階段以避開從歐聯降落嚟嘅列強。COYG!

閱讀 138 次數