週五, 28 十月 2022 09:28

作客燕豪芬賽後報告

賽前愛隊已經穩獲出線資格,不過達帥仍然派出強陣應戰,藍斯度更是首次喺歐霸盃正選出埸,但整體戰意則強差人意。上半場燕豪芬分別有施蒙斯同加保先後食詐糊,入球都被VAR吹走,愛隊可謂飽食驚風散以0比0完上半場返回更衣室。

下半場主隊加強高空攻勢,55分鐘,主隊截得愛隊喺後場嘅界外球後,由迪莊橫傳後上入禁區嘅菲亞曼射入領先1比0。63分鐘,燕豪芬一次左路角球傳中,藍斯度出迎打手槌落空,結果被迪莊頂入空門將比數拉開至2比0。隨後愛隊疲態畢露破關缺力,始終無法喺今場破蛋,最終主隊以2比0取勝,取得另一個出線席位兼喺下週最後一輪賽事同愛隊爭奪首名直入16強的資格。
我哋下一輪賽事將會喺嚟緊星期日晚上主場對聯賽榜尾嘅諾定咸森林,如果演出正常的話,相信都可全取3分。

閱讀 57 次數