週一, 05 九月 2022 01:58

作客對曼聯賽後報告

上半場愛隊基本上比較佔優,進攻流暢兼有自信,12分鐘,薩卡喺中圈一次直線傳送比馬天尼利半單刀射入紅魔大門,可惜球證檢視VAR後話隊長奧迪哥特犯規在先,入球無效。22分鐘,主隊新兵貌似古惑仔嘅安東尼喺右路切入中間起腳,但皮球射高。32分鐘馬天尼利頭槌攻門被迪基亞神救,35分鐘,紅魔一次組織由華舒福將球分到右邊無人看管嘅安東尼熨射入網領先1比0並以此記錄完上半場。

下半場早段於58分鐘紅魔收起安東尼,由C朗入替,雖然愛隊落後一球,不過下半場好努力一路搶攻,60分鐘,隊長奧迪哥特直線送前,耶穌仔想起腳被達洛治快一步踢走,但反而比薩卡喺龍門口前執雞射入,追成1比1平手。66分鐘,愛隊太急於搶攻令中場不設防,費蘭迪斯喺後半場一腳直線撕破愛隊防線比華舒福高速入楔單刀射成2比1,輸經驗。75分鐘,費南迪斯再係右路妙傳,艾歷臣呈單刀姿態,再將皮球橫傳華舒福梅開二度,結果主隊以3比1打破愛隊今季全勝記錄。
經過6輪比賽之後,愛隊依然以15分排聯賽榜首,以1分之差抛離第2位嘅曼城及熱刺。
或者愛隊檢討輸波嘅原因並需要改善,不過我哋亦都要馬不停蹄喺另一條戰線歐霸盃分組賽第一場4日後作客瑞士蘇黎世,喺度球迷會預祝愛隊馬到功成全取3分。

閱讀 535 次數