下半場愛隊非常努力反撲,喺70分鐘,達帥先後以比比及尼基迪亞入替今場停賽復出嘅馬天尼利同蘇亞利斯以加強進攻力度,喺82分鐘終於扳平,亦由兩位後備球員合作建功,尼基迪亞喺右路禁區底線傳到門前6碼點,比比一個美妙轉身後左腳射入追平1比1。缺口打破後,愛隊得勢不饒人繼續向客軍施壓,努力終於有回報,去到補時6分鐘,可以話係最後一擊, 右路短傳,隊長拿卡錫迪喺近底線窄角度射門,斯沙出手擋都擋唔住,皮球入網絕殺狼隊反勝2比1!賽後愛隊升上第5位,僅落後第4位嘅曼聯1分兼打少2場。
我哋下一場比賽係九日後 作客對榜尾第二位嘅屈福特,就襯有咁多日時間養精蓄銳全取3分!