週一, 24 一月 2022 14:41

主場對般尼賽後報告

上半場一開波無耐即有驚嚇,7分鐘客軍麥尼爾左路半傳半射,差dd收死藍斯度。直至中段愛隊開始加快進攻節奏,23分鐘奧迪哥特禁局射門被樸比救出,拿卡錫迪補射但不中目標。臨完半場前又係奧迪哥特助攻比薩卡燙射,僅柱邊出界,結果半場打和0比0。

下半場愛隊繼續佔有控球上嘅優勢,56分鐘薩卡右路傳中,馬天尼利差d頭槌得手。60分鐘今仗非常活躍嘅奧迪哥特處理右路罰球,但僅僅高出。63分鐘愛隊有一次黃金機會,奧迪哥特開出地波,路維掃把腳一燙,但被有神勇演出嘅樸比成功撲出。67分鐘路維左路作個人突破,底線前交後比拿卡錫迪射門,不過又係柱邊出界。雖然尾段愛隊不斷施壓,但始終欠缺埋門一腳,最終以0比0完場,跌咗2分,錯過咗壓過曼聯排聯賽榜第4位置。
下一場比賽要喺國際賽期後作客對狼隊,希望愛隊可以趁呢兩個多星期時間作出檢討及改進,更寄望球會高層可以喺冬季轉會窗完結之前簽得愛隊所需球員補充實力。

閱讀 384 次數 最後修改於 週一, 21 二月 2022 14:43