週一, 27 九月 2021 05:47

主場對熱刺賽後報告

今仗北倫敦打吡同上場對般尼,愛隊喺正選陣容上只有一個變動,就係啱啱坐完波監兼今日係壽星仔嘅沙卡復任正選。
上半場一開波愛隊已經表現出極具侵略性同埋機動性,喺早段12分鐘就打開缺口。奧迪哥特喺中路引球推進,交波比右路嘅薩卡,佢即傳入中間比後上入楔嘅路維撞射破網,領先1比0。愛隊得勢不饒人,27分鐘,隊長奧巴美揚喺前場交波比左邊路維嚟一次one/two再

走位入禁區射成2比0。34分鐘,簡尼喺前場失咗控球權,比到機會愛隊 嚟一次突擊,右邊嘅薩卡輕輕鬆鬆熨入再下一城,半場遙遙領先3比0返更衣室。
下半場,喺3球領先之下愛隊作出調整以防守戰術應付客軍,而熱刺亦只能夠靠孫興文喺79分鐘破蛋,而姆拿就喺補時階段射中楣,結果愛隊今仗就以3比1勝出。
經歷開季3連敗及部份廠迷對新球員嘅質疑之後,可能愛隊明白知恥近乎勇呢個道理,連同英聯盃在內4連勝,只失1球得9分,喺榜尾升上第10位進入聯賽榜前半版。而跟住另外一個考驗就係下一場聯賽作客別一路奇兵對聯賽第六位(如今晚凌晨佢哋可以作客擊敗水晶宮嘅話就會升上第一位) 嘅白禮頓。請愛隊再一次展現熱血澎湃嘅足球再下一城五連勝!COYG!!

閱讀 94 次數