週五, 21 五 2021 05:29

作客水晶宮賽後報告

今仗由隊長奧巴美揚掛帥,薩卡、路維、比比作出支援。上半場愛隊喺控球方面比較佔優,但主隊攻門亦不少,湯堅斯嘅頭槌及立普射門,全被利奴救出。35分鐘,愛隊製造咗一次美妙組織,薩卡以後腳交比迪恩尼傳中,比比近門射入,領先1比0,亦以此比數完上半場。

下半場戰至62分鐘,唐辛開出罰球,賓迪基插水式頂入追平至1比1平手,似乎又要失2分收場。睇嚟好少喺愛隊身上出現嘅永不放棄精神出現喺補時階段,補時1分鐘,奧迪哥特傳中,馬天尼利近門撞入領先2比1,喺補時最後階段比比錦上添花再入1球作客絕殺水晶宮3比1,保持爭取歐霸盃入場券嘅渺茫希望。
嚟到呢一刻差不多亦都係20/21年度英超賽季曲終人散嘅時候,無論兩天後即23號晚上11時主場對白禮頓成績如何都會係一個失望嘅賽季,只希望每一位上陣嘅球員可以喺最後一場主場賽事用表現回饋所有廠迷!COYG!!

閱讀 375 次數