週三, 05 五 2021 05:21

作客紐卡素賽後報告

今場愛隊有隊長奧巴美揚出任正選,而韋利安、馬天尼斯同埋奧迪哥特就後上支援。
上半場5分鐘就有一個好開始,比爾連右路出波,隊長奧巴美揚近柱撻Q,皮球就落喺禁區頂嘅艾拿利,佢順勢抽射貼柱射入領先1比0。紐卡素喺17分鐘出現一個扳平機會,辛麥斯文引波入禁區後起腳,幸得今場正選上陣嘅賴恩僅僅撲出。28分鐘,沙卡左路禁區頂一記冷箭,差d收死杜巴卡,之後仲有艾拿利頭槌攻門,不過被阿米朗及時護空門不至多失,最終愛隊以1比0領先上半場。

下半場戰情維持膠著狀態一段時間,直至62分鐘加比爾接應奧迪哥特左路罰球頭槌攻門,算係最接近入球嘅機會,4分鐘後馬天尼利左路傳中,今場缺態嘅隊長奧巴美揚第一時間凌空接應射入第2球拉開2比0優勢。主隊其後換入祖亞寧頓力求收復失地,但佢哋後備入替嘅舒亞粗野攔截馬天尼利而直接領紅後,可謂破關缺力,最終愛隊以2比0勝出全取3分以49分排第9位。
今仗愛隊雖然作客以2比0擊敗10人應戰嘅紐卡素,但關鍵嘅一場賽事將會喺今個禮拜五凌晨主場對維拉利爾,寄望愛隊可以知恥近乎勇擊敗黄色潛艇進軍歐霸盃決賽!

閱讀 144 次數