週一, 19 四月 2021 05:57

主場對富咸賽後報告

今仗愛隊以拿卡錫迪打單箭頭配合薩卡、路維同馬天尼利作後上支援。上半場一開波即有入波機會,拿卡錫迪交波比馬天尼利作笠射,可惜不中目標,6分鐘後馬天尼利又一次近射被阿希奧拿擋出。富咸19分鐘出現第一次射門機會,馬查把握第一時間起腳,省中人改變方向,差dd收死賴恩。直至尾段愛隊攻勢更為入肉,39分鐘薩卡喺小禁區交比今仗出任隊長嘅比爾連第一時間出波,喺遠柱嘅施巴約斯一頂破網,但經過VAR檢視後,判薩卡“腳趾”越位在先而入球無效。愛隊喺補時階段藉烏龍波第二次將皮球送入網窩,但再一次因路維處於越位位置而再食多一次詐糊,上半場打成0比0平手。

下半場愛隊繼續主導賽事,54分鐘薩卡右路作個人突破,帶波殺入禁區近射中横楣出界。呢一球唔入就埋下輸波嘅伏線,56分鐘加比爾禁區侵犯利明拿,VAR檢視後判富咸獲得12碼,馬查主射得手,富咸領先1比0。落後下達帥先後換入比比同尼基迪亞加強攻力,79分鐘薩卡交出靚波,但尼基迪亞起腳射斜,尾段87分鐘薩卡遠射又僅僅喺楣頂出界,完場前馬天尼利近射又被阿希奧拿救出。去到補時第6分鐘,尼基迪亞終於喺門前混戰中近射得手,最終追回1球主場以1比1同客軍打成平手,各得1分。
相信唔駛多講,如果各位有睇呢場球賽嘅話都會認同VAR喺今場賽果係起到好關鍵性嘅作用,可能英超嘅VAR係世界上係特別嚴謹!過咗去就過咗去,我哋向前望,五日後嘅24號凌晨我哋將會主場對愛華頓,寄望愛隊唔好因為VAR而氣餒,繼續再接再厲以3分為目標,COYG!

閱讀 87 次數