週一, 09 十二月 2024 00:42

作客對富咸賽後報告

愛隊初段已經反客為主,攻防戰正式展開,但非常意外先開紀錄係富咸!10分鐘,占美利斯中場回傳後跑入禁區接應隊友直線傳送,右邊禁區射地波遠柱入網,主隊第一次射門就先開紀錄領先1比0。雖然落後一球,不過愛隊一路積極反撲,12分鐘,懷斯喺禁區頂抽射不過被撲出。23分鐘,甚為活躍嘅懷斯近禁區頂窩利射門,可惜喺遠柱出界。37分鐘,薩卡右路帶波入禁區窄角度射門,被前隊友利奴撲出。39分鐘,懷斯喺小禁區接應薩卡傳中但僅僅未能觸到,結果富咸喺半場領先1比0。

下半場愛隊依然攻勢旺盛,52分鐘,再次施展殺手鐧角球戰術,沙利巴不負所託頂入追成1比1平手。56分鐘,托沙左路抽射又比利奴接實。及後愛隊換入馬天尼利加強攻力,68分鐘,今次輪到湯馬士接應角球頭槌攻門,但頂出界。爭論點就喺88分鐘出現,馬天尼利左路妙傳遠柱,薩卡入攝頭槌頂入反超前,但經VAR檢視後,話馬天尼利越位在先所以入球無效,最終打成1比1平手。
聯賽榜方面,愛隊以15戰得29分,落後少賽1場嘅利物浦6分排第3位。
我哋又要馬不停蹄2日之後喺歐聯戰線主場凌晨迎戰摩納哥,緊記1,2,3要全取3分!

閱讀 213 次數